A secretaria de Estado de Turismo, Isabel Oliver, e o presidente de Axénciaa Turismo de Galicia, Román Rodríguez González, asinaron no Museo da Peregrinaxe de Santiago de Compostela un convenio en materia de Calidade, Produtos Turísticos, Innovación, Accesibilidade e Sustentabilidade Turística.

Ambas as administracións comprométense así a colaborar activamente na promoción, difusión e apoio á implantación de sistemas de calidade, innovación turística, os relacionados coa creación de produtos, accesibilidade, sustentabilidade e intelixencia de destinos en Galicia.

Este convenio non implica transferencia de fondos por ningunha das partes, así como tampouco consignación orzamentaria. A execución dos proxectos será responsabilidade de cada administración asinante de acordo á súa aplicación orzamentaria correspondente.

A política de calidade turística converteuse nun factor fundamental de diferenciación e de competitividade das empresas e do conxunto do sector turístico, operando sempre sobre a base do consenso e a autorregulación dun sistema que persegue consolidar o liderado da nosa industria turística.